Беларуская гульнявая студыя выпусціла галівудскую стратэгію Hollywood Animal

Беларускія распрацоўшчыкі з Weappy Studio выпусцілі ў ранні доступ гульню Hollywood Animal, яна ўжо даступная ў Steam. У гульні можна выбраць беларускую мову і беларускамоўны інтэрфейс.

Гульцам прапануецца ўзначаліць галівудскую кінастудыю напачатку гукавога кіно (канец 20-х гадоў) і прайсці з ёй шлях праз “дзесяцігоддзі творчых дасягненняў, глянцу, распусты, паламаных лёсаў і здзелак з сумленнем”.

Распрацоўшчыкі абяцаюць удзел ва ўсіх этапах кінавытворчасці, інтрыгі, нечаканыя саюзы, сілавыя метады вядзення барацьбы з канкурэнтамі, “маніякальную ўвагу да дэталяў і бясконцую варыятыўнасць”.

Да канца красавіка аўтары плануюць уносіць у гульню невялікія выпраўленні, карэкціроўкі і паляпшэнні на аснове водгукаў карыстальнікаў.

У траўні чакаецца першае глабальнае абнаўленне, дзе будуць квэсты, падзеі, розныя сюжэтныя элементы.

На чэрвень запланавана другое буйное абнаўленне з вечарынамі, фокус-групамі і асабліва вялікімі кінатэатрамі.

У ліпені распрацоўшчыкі дададуць два новыя варыянты вытворчасці фільмаў — “канвеер” і “сярэдняк”.

На другую палову 2025 года заяўлена рэалізацыя некалькіх ключавых асаблівасцяў, уключаючы:

• другі акт сюжэтнай кампаніі;

• магчымасць ствараць франшызы;

• міжнародная дыстрыбуцыя фільмаў;

• макартызм (пераслед камуністаў і "левых" у ЗША ў 1940−1950-х гадах).

Кароткая гісторыя студыі

Студыя Weappy была заснавана ў 2015 годзе ў Беларусі і базіравалася ў Мінску. Цяпер студыя прапісаная на Кіпры. Да галівудскай стратэгіі яны паспелі выпусціць гульні This is the Police, Rebel Cops, The Eternal Life of Goldman.