Беларусам у Латвіі забароняць працаваць у некаторых галінах

Міністэрства ўнутраных спраў Латвіі падрыхтавала папраўкі ў закон аб нацыянальнай бяспецы, якімі прадугледжана забараніць грамадзянам Расіі і Беларусі займаць пасады ў структурах кіравання крытычнай інфраструктурай і асабліва значнай у еўрапейскім маштабе крытычнай інфраструктурай, паведамляе Delfi са спасылкай на агенцтва LETA.

Крытычнай інфраструктурай у Латвіі лічацца аб'екты, якія істотныя для рэалізацыі важных грамадскіх функцый, а таксама аховы здароўя, бяспекі, эканамічнага ці сацыяльнага дабрабыту людзей.

"Уласнік крытычнай інфраструктуры, сапраўдны выгаданабытчык або прававы ўладальнік павінен быць лаяльны Латвіі і яе Канстытуцыі, пры гэтым яму забараняецца аказваць падтрымку, у тым ліку інфармацыйную, асобам або дзяржавам, якія пагражаюць тэрытарыяльнай непадзельнасці, суверэнітэту і незалежнасці або канстытуцыйнаму строю дэмакратычных краін, паведамляюць у МУС Латвіі.

Папраўкі прадугледжваюць, што Расія ці Беларусь, яе грамадзяне ці юрасобы, не могуць быць уладальнікамі, кіраўнікамі ці бенефіцыярамі важных аб'ектаў для краіны і ЕС.

Беларусам і расіянам таксама будзе забаронена займаць пасады ў такіх структурах і проста працаваць там па найму.

Законапраект у хуткім часе разгледзіць урад, а потым і парламент.