Анжаліка Мельнікава мае польскі пашпарт

Анжаліка Мельнікава мае польскі пашпарт — разам з беларускім. Пра гэта ў стрыме Еўрарадыё распавёў Павел Латушка, кіраўнік НАУ і намеснік кіраўніцы АПК.

"Дзеянні, якія, па некаторых версіях ажыццяўляліся ў адносінах да Анжалікі, ажыццяўляліся не толькі ў адносінах да грамадзянкі Беларусі, спікеркі Каардынацыйнай рады, але і ў адносінах да грамадзянкі Польшчы, грамадзянкі краіны Еўрапейскага саюза. Сітуацыя б'е па нацыянальных інтарэсах Польшчы і Еўрасаюза", — кажа Латушка.

Спікерка Каардынацыйнай рады пры атрыманні грамадзянства Польшчы "праходзіла адмысловыя праверкі, якія адбываюцца ў гэтым выпадку", дадаў Павел Латушка.

Адна з версій знікнення Анжалікі Мельнікавай — выкраданне. За ім могуць стаяць беларускія ці расійскія спецслужбы. Але сёння замала інфармацыі, каб напэўна казаць пра нейкі гвалтоўны сцэнар.

Не магу сабе ўявіць, каб Мельнікава была агентам спецслужбаў. Калі выявіцца, што гэта так, — гэта нейкі высачэзны ўзровень. Такімі думкамі ў стрыме Еўрарадыё падзяліўся Латушка. Паводле яго інфармацыі, смартфон Анжалікі Мельнікавай 19 і 25 сакавіка быў у Беларусі (у Мінску).

Пра знікненне спікеркі КР Павел Латушка публічна паведаміў 28 сакавіка. Тады ён сказаў, што сувязі з Мельнікавай няма з 25 сакавіка. Разам з ёй зніклі і дзве яе дочкі.