Амерыканец, які прыехаў з Літвы ў грузавым вагоне, хоча застацца ў Беларусі

На тэлеканале "Беларусь 1" выйшаў сюжэт з 27-гадовым амерыканцам Антонам Росам — гэта менавіта ён перасёк беларуска-літоўскую мяжу ў вагоне грузавога цягніка і быў затрыманы мытнікамі ў Маладзечне.

Малады чалавек кажа, што быў у Беларусі некалькі гадоў таму і вельмі ўпадабаў нашу краіну. Ён заявіў, што ў яго тут ёсць сябры. Таксама Антон Рос заявіў, што хацеў бы застацца ў Беларусі.

"Так атрымалася, што ў мяне цяжка з дакументамі, і я, так бы мовіць, у роспачы паспрабаваў такой апошняй спробай дабрацца да вас сюды. Я быў калісьці ў Беларусі, мне тады вельмі спадабалася. Я быў у Мінску некалькі гадоў таму, і мне ўсё вельмі спадабалася. Мне спадабаліся чысціня, ўтульнасць, прыстойнасць людзей, вось", — сказаў грамадзянін ЗША.

Антон Рос гаворыць па-руску без акцэнту, бо, паводле яго, вучыўся ў рускай школе.

Хлопец сказаў, што з ім выдатна абыходзяцца. "Толькі калі б можна было неяк застацца... Маме сказаць, што ўсё добра. Тут кормяць, пояць, цёпла, можна адпачыць. Ну, карацей, умовы добрыя і ўсё нармальна", — кажа малады чалавек на камеру.

У тэлесюжэце сказалі, што ў яго ёсць "некаторыя праблемы са здароўем", якія развязваюцца беларускімі спецыялістамі.

Раней у Памежным камітэце казалі, што дэпартуюць амерыканца ў Літву пасля прыцягнення да адміністрацыйнай адказнасці.