Адкрыццё памежных пераходаў Польшча будзе каардынаваць з Літвой

Адкрыццё пунктаў пропуску "Кузніца" і "Баброўнікі" на мяжы з Беларуссю Польшча будзе каардынаваць з Літвой. Узгадненні на міжнародным узроўні ўскладняюць працэдуру, але не робяць яе немагчымай.

"Мы былі гатовыя адкрыць два пункты пропуску на мінулым тыдні. Але менавіта ў сувязі з тым, што адбылося ў Літве, і ў сувязі з заявай Літвы мы вырашылі дзейнічаць сумесна і паслядоўна па гэтым пытанні", — паведаміў намеснік міністра ўнутраных спраў і адміністрацыі Польшчы Чэслаў Мрочак у эфіры RMF24.

Ён дадаў, што міністр унутраных спраў і адміністрацыі Марцін Кервінскі абмеркаваў гэтае пытанне ў сераду падчас сустрэчы ў Гданьску міністраў унутраных спраў краін Балтыі. "Сёння ён паразмаўляе са сваім літоўскім калегам. Прэм'ер-міністр Літвы таксама абвясціў пра размову з прэм'ер-міністрам Тускам, таму мы супрацоўнічаем з Літвой", — патлумачыў Мрочак.

У аўторак прэм'ер-міністр Польшчы Дональд Туск заявіў, што ў лістападзе збіраецца аднавіць працу двух пунктаў пропуску на мяжы з Беларуссю. 29 кастрычніка ўрад Літвы заявіў, што мяжа гэтай краіны з Беларуссю будзе закрытая да 30 лістапада. Пры гэтым у Вільні выказалі спадзеў, што Польшча прыме ўзгодненыя меры.