Адкладзены праект па стварэнні беларускага порта ў Прымор'і ў РФ
Рэжыму Лукашэнкі порт патрэбны як важны пункт на транзітным шляху ў Кітай / ria.ru
Адкладзены праект па стварэнні беларускага порта ў Прымор'і ў РФ. "Па фінансавых прычынах", — патлумачыў губернатар расійскага рэгіёна Алег Кажамяка. У аўторак ён сустракаўся ў Мінску з Аляксандрам Лукашэнкам.
Пра згаданы праект згадвалася падчас ранейшых візітаў Кажамякі ў Беларусь. Гаворка ішла пра сумесны ўдзел расіян, беларусаў і кітайцаў. Порт уяўляў цікавасць "у святле развіцця Паўночнага марскога шляху". Рэжыму Лукашэнкі ён патрэбны як важны пункт на транзітным шляху ў Кітай. Год таму на месцы пабывала "каманда спецыялістаў з Беларусі".
Губернатар сцвярджае, што праект проста адкладзены. Ён спасылаецца на высокую банкаўскую стаўку ў Расіі, якая ўплывае і на інфраструктуру, і на кошт транзіту. "Таму пачакаем той час, калі яна знізіцца да разумных межаў", — сказаў Алег Кажамяка. Ён намагаўся даказаць, што праект не мёртвы. "У нас гатовыя партнёры з расійскага боку, з кітайскага, з беларускага", — дадаў губернатар.
Змены Кажамяка чакае ў канцы 2025-га — у пачатку 2026 года.
