Ад Марыі Калеснікавай прапусцілі першы ліст за два з паловай гады
Марыя Калеснікава / Telegram
Першы ліст за два з паловай гады атрымалі родныя ад палітзняволенай Марыі Калеснікавай. Яна піша свайму тату, згадвае дзяцінства і сямейныя падарожжы.
"Я асабліва часта думаю пра тое, як нам з Танечкай пашанцавала быць вашымі і мамінымі дочкамі. З самага нараджэння вы акружылі нас такой любоўю, пра якую толькі марыць можна! Вы дарылі нам з Танечкай адзін аднаго і навучылі нас любіць і сябраваць", — прыводзіць радкі з ліста Інстаграм-акаўнт Віктара Бабарыкі.
Калеснікава піша родным, што згадвае і абдымае іх у думках кожную раніцу і вечар, гледзячы ў неба. Таксама яна кажа, што адчуваю любоў і клопат, якія яе абараняюць і "ўсяляюць упэўненасць, што мы вытрымаем усё".
"Час нашай сустрэчы няўмольна набліжаецца — і гэта будзе самы шчаслівы дзень", — піша яна.
Калеснікава знаходзіцца за кратамі ўжо пяць гадоў — з верасня 2020-га. Рэжым Лукашэнкі прысудзіў ёй 11 гадоў калоніі.
