Ад -3°С да +3°С, галалёдзіца. Прагноз надвор'я ў Беларусі на 9 снежня

9 снежня ў Беларусі прагназуецца галалёдзіца. У сувязі з гэтым МНС абвясціла аранжавы ўзровень небяспекі.

У панядзелак у краіне будзе пераважаць воблачнае надвор'е. У многіх раёнах пройдуць невялікія ападкі — у залежнасці ад тэмпературы гэта будуць снег, мокры снег ці дождж. Месцамі чакаецца слабы туман і галалёд.

Тэмпература паветра на працягу сутак складзе ад -3 да +3 градусаў. Такі прагноз даюць у Рэспубліканскім цэнтры па гідраметэаралогіі, кантролі радыяактыўнага забруджвання і маніторынгу навакольнага асяроддзя Мінпрыроды.

У Мінску 9 снежня будзе пахмурна і слізка. Таксама чакаюцца мокры снег і туман. Тэмпература паветра ў сталіцы ўдзень не паднімецца вышэй за нуль градусаў, а ўночы апусціцца да -2°С.