12-гадовы беларус Маёраў дэбютаваў за 14-гадовую каманду мадрыдскага "Рэала"
Аляксей Маёраў / @fabrica.madrid
Беларус Аляксей Маёраў, які гуляе за мадрыдскі "Рэал", дэбютаваў за юнацкую каманду да 14 гадоў. Пра гэта паведамляецца ў Instagram-акаўнце @fabrica.madrid, дзе расказваецца пра клубныя калектывы "Рэала" малодшых узростаў.
Дагэтуль Маёраў трэніраваўся і гуляў за каманду U-13 (узрост гульцоў не перавышае 13 гадоў). Цяпер жа беларус будзе ў камандзе, дзе футбалісты на год старэйшыя. Свой першы матч за каманду U-14 Аляксей ужо правёў. 11 красавіка хлопчыку споўніцца 13 гадоў.
Пра ттотое, што Аляксей Маёраў падпісаў кантракт з "Рэалам", стала вядома ў жніўні 2024-га. Іспанскія СМІ пісалі, што на юнага беларускага футбаліста прэтэндавала таксама "Барселона".
На пачатку кастрычніка беларус забіў чатыры мячы ў адным з матчаў юнацкага чэмпіянату Іспаніі.
