Затрыманне паляка ў Беларусі не застанецца без адказу — кіраўнік МЗС Польшчы

Затрыманне польскага грамадзяніна ў Беларусі па падазрэнні ў шпіянажы не застанецца без адказу. Пра гэтую заяву міністра замежных спраў Польшчы Радаслава Сікорскага паведамляюць СМІ.

"Мы ведаем, што гэта за рэжым, мы ведаем, чаго ад яго чакаць. Урэшце, у беларускіх турмах ужо ёсць польскія зняволеныя, уключаючы Анджэя Пачобута і іншых. Мы ўжо вядзем унутрыўрадавыя кансультацыі пра тое, як на гэта рэагаваць. І я перакананы, што гэтая справа не застанецца без адказу", — адзначыў Сікорскі.

У сацсетцы Х з каментаром выступіў прэс-сакратар міністра-каардынатара спецыяльных службаў Яцэк Дабжынскі: "Арышт грамадзяніна Польшчы беларускім КДБ — чарговая правакацыя рэжыму Лукашэнкі супраць нашай краіны. Польскія спецслужбы не выкарыстоўваюць манахаў для збору інфармацыі аб вайсковых вучэннях".

Увечары 4 верасня на тэлеканале "Беларусь 1" выйшаў сюжэт пра затрыманне ў Лепелі (Віцебская вобласць) польскага грамадзяніна, якога абвінавацілі ў шпіянажы супраць Беларусі. На відэа мужчына кажа, што яго завуць Гжэгаж Гавел, ён з Польшчы. Сілавікі заявілі, што ў мужчыны была ксеракопія дакумента наконт вайсковых вучэнняў "Захад-2025" з грыфам сакрэтнасці.

Паведамлялася, быццам Гавел праз сацсеткі выйшаў на беларуса і прапанаваў яму супрацу на карысць Польшчы за штомесячную ўзнагароду: беларус мусіў перадаваць інфармацыю пра вайсковую разведку і камандны склад.

Сярод асабістых рэчаў паляка паказалі грошы розных краін (у тым ліку балгарскія левы) і сім-карту МТС, якую, паводле версіі, ён "атрымаў ад кагосьці".

СМІ высветлілі, што затрыманы паляк — 27-гадовы манах каталіцкага ордэна кармелітаў. Ён закончыў  Кракаўскі Папскі ўніверсітэт Яна Паўла ІІ. А сёлета ў сакавіку склаў вечныя шлюбы — гэта значыць, прысвяціў сваё жыццё манаскаму служэнню.