За забойства двухгадовай дзяўчынкі ў Слуцку мужчыну асудзілі на 25 гадоў
Мінскі абласны суд на пасяджэнні ў Слуцку вынес прысуд па справе аб гібелі двухгадовай дзяўчынкі, піша kurjer.info. Максім Чыжык асуджаны на 25 гадоў калоніі ўзмоцненага рэжыму. Маці загінулага дзіцяці Кацярыну Комар асудзілі на два гады папраўчай установы адкрытага тыпу ("хімія").
Здарэнне адбылося ў ноч з 29 на 30 студзеня 2018 года. У Слуцку знайшлі двухгадовую дзяўчынку са слядамі збіцця, выратаваць дзіця не ўдалося. Абвінавачанымі па справе праходзілі маці дзяўчынкі Кацярына Комар і яе сужыцель Максім Чыжык. Яны выхоўвалі пяцярых дзяцей жанчыны ад папярэдніх адносін.
Як заявіла абвінавачванне, Чыжыка некалькі дзён (з 25 па 29 студзеня) раздражнялі плач і гучныя гульні, таму ён хацеў забіць дваіх дзяцей. Двухгадовай дзяўчынцы ён нанёс 198 удараў, а яе 5-гадоваму брату Аляксею — больш за 50 удараў, піша tut.by. Па словах пракурора, калі б не прыезд хуткай, дык мужчына забіў бы і Лёшу. Прычым маці ўвесь час бачыла, што Максім б'е дзяцей.
Дзеянні мужчыны кваліфікаваныя як замах на забойства дзвюх заведама малалетніх асобаў, з асаблівай жорсткасцю, з хуліганскіх меркаванняў, а таксама забойства заведама малалетняга, з асаблівай жорсткасцю, з хуліганскіх памкненняў. Жанчыну вінавацілі за пакіданне ў небяспецы.
Кацярына прызнала сваю віну цалкам, Максім — толькі часткова.
Больш важных і цікавых навінаў у праграме "Еўразум" за 13.12
