За сацыялагічныя даследаванні выставілі абвінавачанне за "здраду дзяржаве"
Рэпрэсіі ў Беларусі / spring96.org
У Беларусі за даследаванні, у тым ліку і сацыялагічныя, выставілі абвінавачанне за "здраду дзяржаве". Пад варту змясцілі траіх мінчукоў — 42-гадовага мужчыну і жанчын ва ўзросце 37 і 43 гадоў.
Як піша Следчы камітэт, мужчына, кіраўнік кампаніі, за матэрыяльную ўзнагароду падрыхтаваў для неназванай арганізацыі даследаванне, якое змяшчае "заведама ілжывыя звесткі аб палітыцы ў галіне аховы здароўя, у частцы прымаемых мер па барацьбе з каранавіруснай інфекцыяй". Жанчыны праводзілі даследаванне, якое датычылася "наяўнасці пераваг сярод грамадзян у развіцці краіны праз інтэграцыю з краінамі Еўрапейскага саюза".
Следчыя налічылі больш за 186 тысяч рублёў "шкоды, прычыненай дзяржаве". Яе абвінавачаныя ўжо кампенсавалі.
Затрыманыя абвінавачваюцца не толькі па артыкуле "здрада дзяржаве", але і ва "ўхіленні ад выплаты страхавых узносаў, якое прывяло да прычынення ўрону ў асабліва буйным памеры".
Крымінальную справу перадалі пракурору для накіравання ў суд.
