З-за ціску КДБ і спецслужбаў Беларусь пакінуў акцёр Аляксандр Ждановіч
Аляксандр Ждановіч / асабісты архіў
Маляваныч з "Калыханкі" — акцёр Аляксандр Ждановіч — пакінуў Беларусь. Як піша Беларуская рада культуры, апошнім часам на акцёра аказвалі ціск КДБ і спецслужбы, яго выклікалі на допыт у ДФР. Цяпер Ждановіч у бяспецы.
У лістападзе 2020 года Аляксандр Ждановіч адседзеў 9 сутак за ўдзел у Маршы народаўладдзя. Тады Ждановіч заступіўся за жанчыну, на якую крычаў АМАПавец. У адказ сілавік загадаў затрымаць акцёра.
У траўні 2021 года Ждановіч быў звольнены з Нацыянальнага акадэмічнага драматычнага тэатра імя Максіма Горкага — за страту даверу з боку наймальніка.
"Аляксандр сваімі дзеяннямі парушыў "Кодэкс гонару", прыняты ў тэатры. Ён заклікаў да адкрытага выступлення супраць улады ў сацсетках. Увогуле, перабраў са сваімі паўнамоцтвамі", — заявіў тады дырэктар тэатра Эдуард Герасімовіч, які сам і прыдумаў "Кодэкс гонару" .
Ждановіч сказаў, што ягонае звальненне было прадказальна. Цяпер акцёр чытае "Казкі з Маляванычам" на YouTube-канале Baybus.
