З чырвона-зялёным шоў і ветэранам. У Мінску стартавала Вышэйшая ліга па футболе

13 сакавіка ў Мінску стартаваў чэмпіянат Беларусі па футболе ў Вышэйшай лізе. Перад першай гульнёй тура паміж "Мінскам" і "Нафтанам" арганізатары зладзілі патрыятычнае міні-спектакль, падчас якога было чырвона-зялёнае фаер-шоу, а сімвалічны першы ўдар па мячы зрабіў ветэран і юны выхаванец "Мінска".

Напярэдадні матча ідэолагі збіралі людзей на стадыён. Арганізацыям і ўстановам было даручана "забяспечыць" прысутнасць "арганізаванай групы глядацкай падтрымкі ў колькасці не менш за 5 чалавек з атрыбутыкай заўзятараў, а таксама з наяўнасцю дзяржаўнай сімволікі".

Гульня скончылася валявой перамогай "Нафтана" — 2:1. На гол "Мінска" ў пачатку першага тайма госці адказалі двума ў другім тайме. Прычым другі мяч быў забіты з пенальці за пяць хвілін да канца гульні.

Першы тур працягнецца заўтра адной гульнёй: 14 сакавіка "Іслач" згуляе супраць "Славіі". 

15 сакавіка пройдуць адразу тры сустрэчы: "Гомель" супраць "Тарпеда-БелАЗ", "Нёман" супраць "Маладзечна-2018", "Віцебск" прыме БАТЭ.

Завершыцца тур 16 сакавіка. "Арсенал" згуляе супраць "Дынама-Брэст", "Слуцк" прыме "МЛ Віцебск", а мінскае "Дынама" — "Смаргонь".

Пачатак футбольнага сезона таксама не задаўся для мінскага "Дынама". Нягледзячы на перамогу ў выставачным матчы за Суперкубак над "Нёманам" (2:0), у ⅛ Кубка Беларусі сталічны клуб прайграў таму ж "Нёману" — 0:2 — і выбыў з турніру.

Дзёрзкі пачатковец

У гэтым сезоне варта сачыць за прыватным клубам "МЛ Віцебск". Каманда фінансуецца ўладальнікам букмекерскай кампаніі "Макслайн" і паводзіць сябе актыўна як на медыяполі, так і на футбольным.

Узімку клуб абвясціў, што правядзе трэніровачны збор на Кіпры, але літаральна за дзень да вылету каманда адправілася трэніравацца ў... Салігорск. СМІ паведамлялі, што міністр спорту Сяргей Кавальчук забараніў замежны збор. Нагадаем, што з 2021 года для ўсіх беларускіх клубаў дзейнічае негалосная забарона на замежныя трэніроўкі.

Зрэшты, "МЛ Віцебск" плённа правёў збор у Беларусі. Каманда нядрэнна ўмацавалася, падпісаўшы вопытных гульцоў і некалькіх легіянераў. Сезон пачаўся для клуба ярка: у Кубку Беларусі яны разграмілі "Белшыну" па суме двух матчаў з лікам 6:0.

Новы генеральны партнёр чэмпіянату

У 2025 годзе змяніўся генеральны партнёр Вышэйшай лігі. Замест шматгадовага спонсара — "Беларусбанка", ім стала букмекерская кампанія Betera.

Геаграфія каманд

У гэтым сезоне зноў палова клубаў чэмпіянату прадстаўлена Мінскам і Мінскай вобласцю, а Магілёўская вобласць засталася без сваіх прадстаўнікоў у Вышэйшай лізе.

Хто стане чэмпіёнам? Прагноз ШІ

Галоўнае пытанне — хто ж стане чэмпіёнам? Рэдакцыя "Трыбуны" вырашыла спытаць у ChatGPT і вось што адказаў штучны інтэлект.

Бонус: канец салігорскага "Шахцёра"

Адзін з лідараў беларускага футбола апошніх гадоў праходзіць працэдуру банкруцтва. Каманда не змагла адысці пасля скандалу з дамоўнымі матчамі і вылецела з вышэйшай лігі ў 2024 годзе.

"Шахцёра" не будзе сярод удзельнікаў першай лігі ў сезоне 2025 года. Клуб актыўна растаецца з гульцамі, і каб не выплачваць ім даўгі, 1 сакавіка пачаўся працэс ліквідацыі.

Справы настолькі дрэнь, што клуб не можа ўтрымліваць нават сваю дзіцячую акадэмію — адну з лепшых па інфраструктуры ў Беларусі.