Яшчэ аднаго намесніка старшыні БАЖ абвясцілі ў міждзяржаўны вышук

Рэжым Лукашэнкі абвясціў у міждзяржаўны вышук намесніка старшыні Беларускай асацыяцыі журналістаў (БАЖ) Алега Агеева. Раней у такі ж вышук быў абвешчаны яшчэ адзін намеснік старшыні БАЖ Барыс Гарэцкі.

У вышуковай базе не пазначана, на падставе якога артыкула ў Беларусі і Расіі шукаюць Алега Агеева. Там ёсць толькі дата нараджэння, месца нараджэння, грамадзянства.

Агееў мяркуе, што хутчэй за ўсё беларускія ўлады зрабілі запыт на вышук у Інтэрпал: "Кожная краіна з’яўляецца суб’ектам, які ажыццяўляе крымінальны пераслед за злачынства, зробленае на яе тэрыторыі. Адпаведна, калі злачынец пакінуў краіну, а праваахоўнікі ведаюць яго новае месцазнаходжанне, яны могуць накіроўваць канкрэтны запыт у тую краіну, дзе ён меркавана знаходзіцца, ці аб’яўляць у міжнародны вышук".

Ён кажа, што вялікая колькасць беларусаў уключаныя ў расійскую базу вышуку праз тое, што беларускія органы пераследу абвясцілі іх у міжнародны вышук.

Сваё абвяшчэнне ў вышук Агееў звязвае з тым, што ў Беларусі супраць яго пачалі нейкую крымінальную справу. "Але ніякіх паведамленняў наконт гэтага я асабіста не атрымліваў. Наўрад ці мяне падавалі ў вышук як зніклага, гэта не мой выпадак", — іранізуе юрыст.

Ён згадвае, што два гады таму Беларускую асацыяцыю журналістаў прызналі экстрэмісцкім фармаваннем. "Адпаведна, гэта ўжо нагода, каб завесці крымінальную справу на намесніка старшыні арганізацыі. Верагодна, так гэта і сталася", — тлумачыць Агееў.

Пры гэтым ён не выключае, што рэжым Лукашэнкі мог мець і іншыя нагоды для крымінальнай справы: "У Беларусі зараз розныя дзеянні могуць крыміналізаваць і лічыць іх злачыннымі, што не адпавядае ніякім міжнародным стандартам. Я дакладна не здзейсніў аніякіх злачынстваў — з’яўляюся юрыстам і ведаю свае правы. Але мірная рэалізацыя маіх правоў у большасці выпадкаў зараз у Беларусі забароненая".