Некаторыя беларусы, якія жывуць за мяжой, атрымалі дзіўную прапанову з РБ

Некаторыя беларусы, якія стала жывуць за мяжой, атрымалі дзіўную прапанову з Беларусі. Ім трэба падпісаць заяву, што яны не плануюць вяртацца на Радзіму і згодныя, што супраць іх спыняць крымінальную справу "з-за заканчэння тэрміна крымінальнага пераследу". Пра новую ініцыятыву сілавікоў РБ піша belsat.eu.

Аксана Б., якая 14 гадоў жыве ў Варшаве і пабралася шлюбам з грамадзянінам Польшчы, расказала, што на адрас, дзе яна прапісаная ў Беларусі, на яе імя прыйшоў такі ліст. Міліцыя прапануе падпісаць ужо падрыхтаваную заяву і адправіць яе ў Следчы камітэт. Падставай для распачацця супраць беларускі крымінальнай справы за "абразу прадстаўніка ўлады" сталі яе крытычныя выказванні ў Facebook пра дзеянні сілавікоў у Беларусі.  Просьбы зʼявіцца ва ўпраўленне ўнутраных спраў "для дачы паказанняў" жанчына ігнаравала.

"Я напісала, што нічога не падпішу і няхай закрываюць "за адсутнасцю складу злачынства", — кажа Аксана Б. — Адкрываць справу згоды не пыталіся. Хай гэтак жа і закрываюць. Хочуць, каб я падпісала і такім чынам прызнала віну. Дык ім гэтага падалося мала, прапанавалі напісаць, што не планую вяртацца дадому".

Раней пра такую ініцыятыву сілавікоў вядома не было.