Як рэзкі перапад тэмпературы ўплывае на здароўе? Вось што кажа навука

У Беларусі рэзка змянілася надвор’е: за адну ноч амаль што майскае цяпло змянілася на замаразкі і мокры снег. Ці ўплывае такі рэзкі перапад тэмпературы на здароўе чалавека? Еўрарадыё знайшло некалькі даследаванняў на гэтую тэму.

Напрыклад, большасць даследаванняў, прааналізаваных у рамках сістэматычнага агляду, выявілі сувязь паміж сутачнымі ваганнямі тэмпературы і ростам смяротнасці, а таксама захворваннямі сардэчна-сасудзістай і дыхальнай сістэм. Дзеці і людзі сталага веку былі вызначаныя як найбольш уразлівыя да такіх умоў.

Аўтары агляду, аднак, адзначаюць: патрэбныя далейшыя даследаванні, бо ёсць шмат абмежаванняў і “але”.

Іншыя даследаванні таксама пацвярджаюць сувязь паміж вялікім сутачнымі дыяпазонам тэмператур і смяротнасцю або развіццём сур’ёзных захворванняў.

Паводле даследаванняў, рэзкія перапады тэмпературы могуць таксама прыводзіць да пачашчэння прыступаў астмы, ХОБЛ, арытміі і шэрагу іншых станаў. Можа пагаршацца сон і ўзрастаць стомленасць.

Як падтрымаць арганізм?

Каб дапамагчы арганізму справіцца з пагодным стрэсам, рэкамендуюць падтрымліваць стабільную тэмпературу ў доме, правільна апранацца перад выхадам на вуліцу (не “збівацца з толку календаром”), піць дастаткова вадкасці, сачыць за адпачынкам і харчаваннем.