Вялікабрытанія гатовая адправіць войскі ва Украіну — прэм'ер-міністр
Кір Стармер / офіс прэзідэнта Украіны
"Я гатовы, і я хачу размясціць войскі ва Украіне", — заяўляе прэм’ер Вялікабрытаніі Кір Стармер. Каралеўства можа пайсці на такі крок у выпадку перамір’я, каб гарантаваць бяспеку Украіны.
"Любая роля ў забеспячэнні бяспекі Украіны дапамагае гарантаваць бяспеку нашага кантынента і бяспеку гэтай краіны. Канец гэтай вайны, калі ён наступіць, не можа стаць проста часовай паўзай перад тым, як Пуцін зноў нападзе", — падкрэсліў кіраўнік брытанскага ўрада.
Словы прэм’ера Вялікабрытаніі прагучалі на фоне заяў пра тое, што ЗША не бачаць Еўропу "фізічна" на перамовах па Украіне, а таксама праз засцярогі таго, што ўмовы перамір’я могуць быць нявыгадныя для Кіева.
Сёння лідары шэрагу еўрапейскіх краін, у тым ліку Вялікабрытаніі і Польшчы, збяруцца ў Парыжы па запрашэнні прэзідэнта Макрона. Тэрміновая сустрэча арганізаваная пасля Мюнхенскай канферэнцыі і апошніх заяў з боку ЗША. Чакаецца, што там будзе выпрацоўвацца канкрэтны план Еўропы.
