У ЗША прайшлі першыя масавыя пратэсты пасля вяртання Трампа ў Белы дом

5 красавіка ў многіх гарадах ЗША адбылася найбуйнейшая агульнанацыянальная акцыя пратэсту з таго часу, як Дональд Трамп уступіў на пасаду.

Арганізатары кампаніі Hands Off запланавалі мерапрыемствы ў 1200 месцах ва ўсіх 50 штатах. У суботу вялікія натоўпы людзей былі заўважаныя ў Бостане, Нью-Ёрку, Чыкага, Лос-Анджэлесе і Вашынгтоне.

Сярод насельніцтва буйных гарадоў ЗША пераважаюць праціўнікі Трампа. Аднак публічных пратэстаў за апошнія месяцы было няшмат, піша BBC. Гэта тлумачыцца рознымі прычынамі: ад стомы і дэпрэсіі ліберальнай часткі амерыканскага грамадства з-за шматгадовай культурнай вайны да страху, што пратэсты могуць справакаваць Трампа на жорсткі адказ.

У Вашынгтоне на мітынгу выступілі заканадаўцы ад Дэмакратычнай партыі. Асабліва шмат гаварылася пра ўплыў багатых спонсараў Трампа, перш за ўсё Ілона Маска. Кангрэсмен з Фларыды Максвэл Фрост назваў гэта “захопам нашага ўрада мільярдэрамі”.

“Калі вы крадзеце ў народа, чакайце, што народ паўстане. На выбарчых участках і на вуліцах”, — падкрэсліў палітык.

Сам Трамп у суботу гуляў у гольф у Мар-а-Лага і мае намер працягваць у нядзелю.