У ЗША не выключаюць увядзення поўнай забароны на імпарт расійскага алюмінію

Белы дом разглядае магчымасць поўнай забароны на імпарт расійскага алюмінію, піша Bloomberg са спасылкай на інфармаваныя крыніцы.

Алюміній быў доўга абаронены ад санкцый з прычыны яго важнасці. Ён выкарыстоўваецца ў шматлікіх вытворчасцях: ад аўтамабіляў да iPhone.  Паводле дадзеных журналістаў, Белы дом разглядае тры варыянты абмежаванняў: непасрэдная забарона; павышэнне тарыфаў да такога ўзроўню, каб яны маглі быць раўнацэннымі забароне; санкцыі супраць кампаніі, якая вырабляе метал. Калі забарона будзе ўведзеная, спажыўцам у ЗША і іншых краінах давядзецца спешна шукаць замену алюмінію.

Пытанне новых санкцый і забароны алюмінію паўстала пасля нядаўніх ракетных атак Расіі па Кіеве і іншых украінскіх гарадах. У выніку масіраваных абстрэлаў былі пашкоджаныя ключавая інфраструктура і грамадзянскія аб'екты.

Bloomberg нагадвае, што Расія з'яўляецца другім у свеце вытворцам алюмінію пасля Кітая. Толькі ў ЗША расійскія пастаўкі складаюць каля 10% ад агульнага аб'ёму імпарту алюмінію. І ў апошнія месяцы яны раслі. Раней Reuters пісала, што ЕС і ЗША павялічылі закупку ключавых прамысловых металаў у Расіі нягледзячы на праблемы з лагістыкай. Імпарт алюмінію і нікелю з Расіі ў ЕС і ЗША цягам сакавіка-чэрвеня вырас на 70%, агульны кошт закупак склаў амаль два мільярды долараў.

Але вайна цягнецца ўжо восьмы месяц, і застаецца ўсё менш пазіцый, у дачыненні да якіх не ўведзеныя санкцыі. Дыскусія ў Белым доме з нагоды алюмінію "цягнецца ўжо некалькі тыдняў", гаворыцца ў матэрыяле Bloomberg.