У Светлагорску каля дзіцячага садка аўтобус трапіў у "пастку"

У Светлагорску ў Гомельскай вобласці аўтобус трапіў у "пастку" каля дзіцячага садка, побач з двума школамі. Ён не змог праехаць па праездзе, дзе некалькі тыдняў таму брыгада спецыялістаў ліквідавала наступствы аварыі. Ці былі ў аўтобусе людзі (магчыма, дзеці?), sn.by не ўдакладняе.

Высветлілася, што ў лютым у тым месцы быў прарыў трубаправода — трэснула чыгунная труба. Выданне распавядае, як "у складаных умовах надвор'я", у мінусавую тэмпературу, "спецыялісты адрамантавалі пашкоджаны ўчастак трубаправода, засыпалі катлаван, выраўнялі грунт на газоне, а месца раскопак падсыпалі друзам". Паколькі зямля была замерзлай, далейшыя работы па добраўпарадкаванні "адклалі да таго моманту, калі на вуліцы пацяплее", аднак рух аўтатранспарту аднавілі.

На вуліцы пацяплела, а рамонт дарогі так і не зрабілі. Цяпер спецыялісты філіяла "Светлагорскводаканал" выказваюць здагадку, што "утрамбаванае зямлёй і друзам месца, хутчэй за ўсё, не вытрымала вагі аўтобуса і прасела пад яго масай". Аўтобус выцягнулі з ямы, а месца абгарадзілі. І плануюць "у бліжэйшы час" нарэшце правесці "ўсе неабходныя работы па добраўпарадкаванні". Галоўнае, каб паспелі да пахаладання.