У Расіі апублікавалі ўнікальныя фота будаўніцтва Дома ўрада ў Мінску

Расійскі сайт “Дзяржкаталог” выклаў у адкрыты доступ фотаальбом з унікальнымі здымкамі будаўніцтва і адкрыцця Дома ўрада ў Мінску. На гэта звярнуў увагу канал “Беларускі піонэр”.

Фатаграфіі захоўваюцца ў фондах Дзяржаўнага музея гісторыі Санкт-Пецярбурга.

На здымках можна пабачыць першую стадыю будаўніцтва будынка.

Сярод фота — шмат здымкаў з старшынёй СНК БССР Мікалаем Галадзедам, які інспектуе будаўніцтва Дома ўрада ў Мінску ў 1933 годзе.

Фінальная стадыя будаўніцтва Дома Ураду ў Мінску.

Кароткая гісторыя будаўніцтва Дома ўрада ў Мінску

Будынак быў узведзены ў перыяд з 1930 па 1934 год паводле праекта архітэктара Іосіфа Рыгоравіча Лангбарда. У той час Мінск яшчэ не меў генеральнага плана рэканструкцыі і развіцця, а яго цэнтральная частка (з галоўнай вуліцай шырынёй 18—26 метраў) была шчыльна забудована.

Таму будаўніцтва было даволі складаным. Для ўзвядзення будынка абралі ўчастак у заходняй частцы горада, дзе знаходзіліся хаатычна размешчаныя нізкапавярховыя дамы.

Дом урада будавалі ўручную, без экскаватараў, бульдозераў і вежавых кранаў. Будаўнічыя механізмы ў БССР амаль што адсутнічалі, а цэмент і метал былі вялікім дэфіцытам.

Катлаван пад фундамент капалі ўручную, зямлю вывозілі на вазах. Адзінае механізаванае рашэнне падчас будаўніцтва — зроблены з бервяна шахтны пад’ёмнік для ўздыму цэглы і іншых матэрыялаў на вышыню.

На пачатку 1930-х гадоў Дом урада стаў самым высокім будынкам у Мінску.