У Мінску здзейсніў апошні рэйс унікальны трамвай
Ён быў выраблены ў адзіным экзэмпляры / @dimka_photography
28 лістапада ў Мінску здзейсніў свой апошні рэйс адзін з самых доўгіх трамваяў. Ён курсіраваў па лініі трамвая №3, часам выязджаў на 11-ы маршрут.
Гаворка ідзе пра мадэль мінскага завода “Белкамунмаш” — АКСМ-743, яе даўжыня 26 метраў. Умяшчаў ён 302 чалавекі.
Склад быў эксперыментальнай мадэллю, а выпусцілі яго ў 2002 годзе. Ён стаў “першым у гісторыі прадпрыемства трохсекцыйным сачлянённым трамваем са зменным узроўнем падлогі і павышанай умяшчальнасцю з інавацыйнымі схемамі прывада і кіравання”.
Дадзеная мадэль была выпушчана ў адзіным экзэмпляры, у серыю яна не пайшла. Масавай стала мадэль АКСМ-843 з удасканаленымі характарыстыкамі выпуску 2008 года.
