У Мінску раскрылі забойства электрыка ў гаражным кааператыве

Супрацоўнікі Фрунзенскага РУУС Мінска раскрылі забойства 34-гадовага электрыка гаражна-будаўнічага кааператыва, якое было здзейсненае ў яго ж гаражы. Яго труп са множнымі ўдарамі галавы знайшлі раніцай 13 верасня.

Жонка забітага распавяла міліцыі, што напярэдадні яны з мужам адпачывалі на прыродзе ў кампаніі знаёмых і вярнуліся дадому позна ўвечары. Жонка пайшла ў кватэру, а муж застаўся на вуліцы гуляць з сабакам. Праз гадзіну гаспадыня забрала гадаванца, а муж застаўся на вуліцы — ён за гэты час паспеў знайсці сабе новых сяброў і вырашыў выпіць з імі за знаёмства проста каля пад’езду. 

Раніцай жанчына прачнулася і заўважыла, што мужа ўсё яшчэ няма дома. Яна патэлефанавала яму, аднак тэлефон не адказваў, а пасля стаў “недаступным”. Жонка папрасіла сваіх братоў дапамагчы з пошукамі мужа. Праз некаторы час яго цела з прыкметамі гвалтоўнай смерці знайшлі ў гаражы па вуліцы Мантажнікаў.

Міліцыя аднавіла карціну таго дня. Пацярпелы і яго новыя знаёмыя пасварыліся, з-за чаго адбылася бойка. Аднак канфлікт хутка ўладзілі і вырашылі выпіць разам яшчэ. Затым мужчыны паехалі на таксоўцы ў гараж забітага, дзе было спіртное. Дарэчы, у тым самым гаражна-будаўнічым кааператыве мужчына працаваў электрыкам.

Пасля чарговай порцыі алкаголю адзін з гасцей вырашыў адпомсціць гаспадару гаража за тое, што той пабіў яго сябра падчас сваркі ля пад’езду. Ён узяў кувалду і ўдарыў ёй пацярпелага па галаве. Пасля гэтага п’яная кампанія сышла з гаража, папярэдне забраўшы ўсе прадметы, на якіх былі сляды рук. Гэтыя рэчыўныя доказы яны закапалі на бліжэйшым пустыры, а тэлефон забітага ў той жа дзень прадалі выпадковаму знаёмаму.

Міліцыя даволі хутка высветліла асобы забойцы і яго прыяцеля. Гэта 32-гадовы і 29-гадовы мінчане, якія былі затрыманыя і дастаўленыя ў РУУС.

Па факце забойства распачатая крымінальная справа, праводзіцца расследаванне, паведамляе прэс-служба ГУУС Мінгарвыканкама.