У маладзечанца канфіскавалі больш за 1300 літраў брагі
Жыхары вёскі Забалацце Маладзечанскага раёна паведамілі міліцыянтам, што 28-гадовы мужчына займаецца незаконным бізнэсам, піша uvd-mo.gov.by.
Праверка пацвердзіла падазрэнні вяскоўцаў: міліцыянты выявілі ў дзвюх палімерных ёмістасцях 1350 літраў самагоннай брагі. Мужчына заявіў, што вырабіў сурагат для асабістых патрэбаў — каб карміць жывёлу. Але аб'ёмы брагі прымусілі праваахоўнікаў сумнявацца ў тым, што яна пойдзе на корм жывёлам.
На маладзечанца склалі два пратаколы — за выраб самагону і захоўванне апаратаў для яго вырабу.
Дарэчы, гаспадар сядзібы і раней прыцягваўся да адказнасці за парушэнні антыалкагольнага заканадаўства.
