У Беларусі ўжо 617 палітвязняў
Беларускія праваабаронцы прызналі палітвязнямі яшчэ 7 чалавек. Гэта — Андрэй Асаула, Аляксей Баяровіч, Таццяна Звярко, Дзяніс Іваноў, Іван Ківа, Артур Рыбін і Аляксандр Шчарбацюк. Іх справы названыя "палітычна матываванымі". Праваабарончая супольнасць патрабуе вызвалення палітзняволеных.
Асаула асуджаны судом Заводскага раёна Мінска па артыкулах "Абраза прэзідэнта", "Гвалт або пагроза ўжывання гвалту ў дачыненні да супрацоўніка органаў унутраных спраў" і "Абраза прадстаўніка ўлады" да трох гадоў калоніі агульнага рэжыму.
Баяровіч атрымаў год і шэсць месяцаў абмежавання волі з накіраваннем ва ўстанову адкрытага тыпу за абразу кіраўніка дзяржавы ў сацсетцы. Прысуд вынес суд Смаргонскага раёна.
Звярко за абразу кіраўніка дзяржавы і "прадстаўніка ўлады" асуджана судом Лідскага раёна да аднаго года і шасці месяцаў калоніі агульнага рэжыму.
Іваноў атрымаў 2 гады абмежавання волі з накіраваннем ва ўстанову адкрытага тыпу таксама па артыкуле "Абраза прэзідэнта". Справу разглядаў суд Цэнтральнага раёна Мінска.
Ківа асуджаны судом Ленінскага раёна Магілёва за абразу міліцыянераў у сацсетцы да 2 гадоў абмежавання волі з накіраваннем ва ўстанову адкрытага тыпу.
Рыбін асуджаны Гомельскім абласным судом да трох з паловай гадоў калоніі агульнага рэжыму за "хуліганства" і "распальванне варожасці". Ён зрабіў інсталяцыю з партрэтам Аляксандра Лукашэнкі і напісаў абразлівы каментар у тэлеграме.
Шчарбацюк асуджаны судом Савецкага раёна сталіцы за абразу кіраўніка дзяржавы да аднаго года калоніі строгага рэжыму.
У нашай краіне ўжо 617 палітвязняў. Такой колькасці палітычных зняволеных у незалежнай Беларусі яшчэ не было.
