У Беларусі прапануюць адну вакансію з заробкам 85 млн рублёў у месяц

Міністэрства працы і сацыяльнай абароны распаўсюдзіла інфармацыю пра вакансіі з заробкамі ад 30 да 85 мільёнаў рублёў у месяц. Шэсць іх з заробкамі 30-37 млн рублёў, тры — 45-49 млн.

Як паведамляе БЕЛТА, заробак 49 млн рублёў прапануюць у адной з кампаній Кітайска-беларускага індустрыяльнага парку, але гендырэктар мусіць мець досвед працы ў галіне лагістыкі і ведаць кітайскую мову. Мінскае ўнітарнае прадпрыемства шукае гендырэктара з досведам працы ў буйных будаўнічых арганізацыях і веданнем сербскай, славенскай і англійскай моваў. Абяцаюць заробак большы за 45 млн.

Авіякампанія "Белавія" прапануе заробак у памеры 45 млн рублёў для камандзіра паветранага судна. Веданне замежных моваў абавязковае. Аднаму з замежных прадпрыемстваў у Мінску патрабуецца 10 інжынераў-праграмістаў з веданнем англійскай і ўкраінскай моваў. Абяцаюць заробак 30 млн кожнаму.

Самы высокі заробак у Беларусі — 85 млн рублёў — прапануе адно з мінскіх прадпрыемстваў. Яму патрэбны дырэктар па тэхнічных пытаннях, які свабодна валодае англійскай і ўкраінскай мовамі.

Фота: Fotolia