У Аўстраліі памёр донар-рэкардсмен, які выратаваў жыцці мільёнам дзяцей
Джэймс Харысан з унукам / lifeblood.com.au
У Аўстраліі памёр донар-рэкардсмен, які выратаваў жыцці 2,4 млн дзяцей. Джэймсу Харысану было 88 гадоў. Ён жыў у доме састарэлых у Новым Паўднёвым Уэльсе, паведамляе "Бі-Бі-Сі".
У яго крыві быў рэдкі імунаглабулін (anti-D), які патрэбны для вытворчасці асаблівай сыроваткі. Яна ратуе жыццё цяжарным і немаўлятам у сітуацыі рэзус-канфлікту крыві.
Харысан вырашыў стаць донарам у 14 гадоў, пасля таго, як яму рабілі пераліванне крыві падчас сур'ёзнай аперацыі на грудной клетцы. Плазму крыві ён пачаў здаваць у 18 гадоў. І працягваў гэта рабіць кожныя два тыдні амаль да 81 года.
Джэймс Харысан з 2005 года быў сусветным рэкардсменам па колькасці ахвяраванай плазмы. Аднак у 2022-м новы рэкорд устанавіў мужчына з ЗША.
"Ён заўсёды казаў: гэта не балюча, а жыццё, якое ты ратуеш, можа быць тваім уласным", — кажа пра бацьку дачка донара.
