У ААН раскрытыкавалі беларускі законапраект за абмежаванне права на працу

Спецдакладчыкі ААН выступілі з крытыкай беларускага законапраекта "Аб змяненні законаў па пытаннях забеспячэння правоў дзяцей". У ім людзям, асуджаным за так званы "экстрэмізм", забараняецца працаваць педагогамі. Ад ААН у Мінск быў накіраваны ліст, у якім гэтыя меры называюць абмежаваннем праваў на працу. Пра гэта піша выданне "Зеркало", якое таксама атрымала гэты ліст.

У законапраекце плануецца, што працаваць педагогамі не змогуць людзі, якія маюць непагашаную або нязнятую судзімасць. А тыя, хто здзейсніў "злачынствы экстрэмісцкай накіраванасці", не змогуць атрымаць працу педагога незалежна ад зняцця ці пагашэння судзімасці або спынення крымінальнага пераследу. Прычым у дакуменце не пазначана, якія артыкулы КК лічацца "экстрэмісцкімі".

У першым чытанні гэты законапраект ужо прыняла Палата прадстаўнікоў. Пасля гэтага яго мусіць ухваліць Савет Рэспублікі, а потым — падпісаць Лукашэнка.

Спецдакладчыкі ААН нагадваюць афіцыйнаму Мінску, што ўжо неаднаразова адзначалі несумяшчальнасць беларускіх "антыэкстрэмісцкіх" законаў з міжнароднымі стандартамі ў галіне правоў чалавека. Прапановы па абмежаванні ў праве на працу, змешчаныя ў законапраекце, яны называюць залішнімі і несувымернымі "ў адпаведнасці з міжнародным правам у галіне правоў чалавека". Прыняцце закона ў такім выглядзе, мяркуюць у ААН, дасць празмерныя правы выканаўчай уладзе, што можа прывесці да парушэнняў права кожнага чалавека на магчымасць зарабляць сабе на жыццё працай, якую ён свабодна выбірае.

Ініцыятыву рэжыму Лукашэнкі ў ААН ацэньваюць як "дыскрымінацыю па прыкмеце палітычных ці іншых перакананняў" — з улікам таго, што ў Беларусі ёсць злоўжыванні антыэкстрэмісцкім заканадаўствам для пераследу палітычнай апазіцыі, праваабаронцаў, работнікаў СМІ, грамадзянскіх актывістаў ды іншых людзей за "іх фактычную або меркаваную нязгоду з уладамі".

Спецдакладчыкі ААН заклікаюць афіцыйны Мінск перагледзець і перапрацаваць законапраект, каб ён адпавядаў міжнародным абавязанням краіны па правах чалавека.