Студэнтка Вікторыя Міронцава выйшла на волю. Нагадваем яе гісторыю
Вікторыя Міронцава з сястрой пасля вызвалення / Instagram-акаўнт Анастасіі Міронцавай
Палітзняволеная Вікторыя Міронцава выйшла на волю, адбыўшы ўвесь тэрмін зняволення. Пра гэта ў сваім Instagram-акаўнце расказала яе сястра, мастачка Анастасія Міронцава.
"Віка на волі! У сваёй любімай шапцы. Баіцца прачнуцца, але гэтага не здарыцца. Таму што гэта не сон", — напісала Анастасія Міронцава.
Дзяўчына вучылася ў гімназіі-каледжы мастацтваў імя Ахрэмчыка. Дзвюх сясцёр затрымалі ў кастрычніку 2020 года "за актыўны ўдзел у групавых дзеяннях, якія груба парушаюць грамадскі парадак". Анастасія Міронцава выйшла на волю сёлета летам.
У лістах дадому Вікторыя Міронцава пісала, што ў найбліжэйшыя два гады пасля вызвалення будзе невыязной. За гэты час яна планавала аб'ехаць усю Беларусь.
