Студэнт-юрыст у Варшаўскім універсітэце адсек галаву вахцёрцы
Месца трагедыі ў Варшаўскім універсітэце / onet.pl
7 траўня студэнт-юрыст у галоўным кампусе Варшаўскага ўніверсітэта напаў з сякерай на людзей.
Паводле неафіцыйных звестак, хлопец адсек галаву 53-гадовай вахцёрцы ўніверсітэта. На дапамогу жанчыне кінуўся 39-гадовы супрацоўнік аховы, але ён таксама пацярпеў: у цяжкім стане яго даставілі ў шпіталь.
Паліцыя затрымала нападніка. Гэта грамадзянін Польшчы, 22-гадовы студэнт трэцяга курса юрыдычнага факультэта Варшаўскага ўніверсітэта.
Як піша Onet.pl, падчас нападу на тэрыторыі ўніверсітэта знаходзіўся міністр юстыцыі Адам Боднар. Ён удзельнічаў у лекцыі. Пасля нападу яго эвакуявалі з тэрыторыі ўніверсітэта. У сацсетках міністр напісаў, што не быў сведкам трагедыі, бо прысутнічаў на акадэмічнай лекцыі.
Сённяшні дзень у Варшаўскім універсітэце абвешчаны жалобным.
