Следчы камітэт завяршыў расследаванне забойства ігуменні Васілісы
Следчы камітэт завяршыў расследаванне крымінальнай справы па забойстве манахіні Васілісы — ігуменні манастыра ў вёсцы Барань Барысаўскага раёна.
Як паведамлялася раней, здарэнне адбылося 5 студзеня 2017 года. Каля дзявятай гадзіны вечара 29-гадовая прыхаджанка, якая атрымала прытулак у манастыры, на кухні нанесла ігуменні больш за 10 нажавых раненняў. Ад іх жанчына памерла на месцы здарэння.
Следчыя апыталі дзясяткі сведкаў. Многія з іх казалі, што ў падазраванай напярэдадні здарэння былі заўважныя прыкметы псіхічнага засмучэння.
Падазраваная жанчына прайшла комплексную стацыянарную псіхолага-псіхіятрычную экспертызу. Паводле высноваў эксперта, у момант злачынства яна не магла ўсведамляць фактычны характар і грамадскую небяспеку сваіх дзеянняў і кіраваць імі.
На падставе доказаў, атрыманых падчас расследавання, крымінальная справа перададзеная пракурору для накіравання ў суд. Мяркуецца, што ён прыме рашэння, каб да падазраванай ужылі прымусовыя меры бяспекі і лячэння.
