Шакуцін страціў даўгабуд "Шантэр Хіл" у Мінску
"Шантэр Хіл" / Кадр з відэа
Аляксандр Шакуцін страціў не толькі "Амкадор", але і даўгабуд "Шантэр Хіл" у Мінску, піша "Наша ніва". Для яго ўзвядзення ён залез у кітайскі крэдыт на $120 мільёнаў, але так і не здолеў скончыць будаўніцтва.
"Шантэр Хіл" — гіганцкі, у 140 тысяч квадратаў, комплекс на праспекце Пераможцаў, каля Драздоў. І будынак, і зямля ўжо не належаць кампаніям Шакуціна. Хто новы ўласнік і на якіх умовах, пакуль невядома.
Пра нацыяналізацыю машынабудаўнічага холдынгу "Амкадор" стала вядома ў сярэдзіне сакавіка. Дзяржава адабрала ў бізнесмена кампанію і аддала яе пад кантроль БелАЗа. Мяркуецца, што няўдалы праект па будаўніцтве "Шантэр Хіл" знякровіў абаротныя сродкі асноўных машынабудаўнічых прадпрыемстваў, і Аляксандр Шакуцін трапіў ў крэдытную пастку.
