Расіянін, затрыманы ў Польшчы за шпіянаж, прыязджаў на пратэсты ў Беларусь

Расіянін, затрыманы ў Польшчы па падазрэнні ў шпіянажы, прыязджаў на пратэсты ў Беларусь. Тады Ігар Рогаў быў каардынатарам руху "Адкрытая Расія".

11 жніўня 2020 года яго разам з яшчэ адным расіянінам схапілі ў цэнтры Мінска, жорстка збілі і кінулі ў ізалятар. Але ненадоўга: ужо 14 жніўня Рогаў апынуўся ў Маскве і расказваў у інтэрв'ю пра бесчалавечныя адносіны беларускіх сілавікоў.

А нядаўна мужчыну затрымалі ў Польшчы. Яго падазраюць у шпіянажы на карысць расійскага ФСБ. З неафіцыйных крыніцаў вядома, што Рогава здала жонка, якая западозрыла яго ў сямейнай нявернасці.

"Я мусіў займацца тым, што мне падабаецца: улівацца ў шэрагі расійскіх апазіцыянераў, знаёміцца ​​з новымі людзьмі і ў выніку паведамляць пра ўсё ў ФСБ. Мне здавалася, што я прыношу больш карысці, чым шкоды", — цытуюць прызнанне актывіста польскія медыі. Ён заявіў, што пайшоў на супрацу са спецслужбамі пад пагрозай шантажу: ягонага бацьку абяцалі адправіць на вайну супраць Украіны.

Падчас расследавання польскія спецслужбы знайшлі ў смартфоне Рогава фатаграфіі газаправода Сасновец і цеплатрасы Таурон. Таксама вядома, што ён прасіў жонку адвезці ў Расію флэшку з зашыфраванай справаздачай. У СМІ пішуць таксама, што на імя Рогава іншы расіянін выслаў пасылку з кампанентамі для выбуховага прыстасавання.