Пошта Чэхіі спыніла прыём адпраўленняў у Беларусь
Ліст, ілюстрацыйнае фота / pixabay.com
Пошта Чэхіі ад 1 снежня спыніла прыём адпраўленняў у Беларусь. Адпаведная інфармацыя з'явілася на афіцыйным сайце ўстановы, заўважыла Радыё Свабода.
Таксама ў суполцы беларусаў Чэхіі з'явіўся такі допіс: "Учора зайшла на пошту адправіць у РБ паштоўку да Новага Года. Паштоўку не ўзялі, сказалі, што ім прыйшоў новы ўказ не адпраўляць лісты ў РБ, камп'ютар таксама не пусціў — краіна Беларусь заблакаваная".
Летась Чэхія ўвяла для грамадзян Беларусі і Расіі бестэрміновую забарону на выдачу віз і дазволаў на жыхарства.
У некаторых выпадках атрымаць чэшскую візу ці ДНЖ у гэтай краіне ўсё ж магчыма. для гэтага заяўнік, напрыклад, павінен быць чальцом сям’і грамадзяніна Чэхіі або іншай краіны Еўрасаюза ці іншаземца, які мае чэшскі ДНЖ.
Беларусы таксама могуць атрымаць візу для навучання, калі стыпендыю ім выплочвае Чэхія, ЕС ці міжнародная арганізацыя. Таксама пад выключэнне трапляюць заяўнікі, чыё знаходжанне "адпавядае інтарэсам Чэшскай Рэспублікі" з пацвярджэннем МЗС краіны.
