Польшча ўводзіць беспалётную зону ўздоўж межаў з Беларуссю і Украінай

Польшча абмежавала палёты ўздоўж межаў з Беларуссю і Украінай. Пра гэта паведаміла аперацыйнае камандаванне відаў Узброеных сіл Польшчы.

Гэта адбылося пасля ўчарашняй начной масіраванай атакі расійскіх дронаў на тэрыторыю Польшчы.

Абмежаванне на палёты разлічанае на тры месяцы. Яно пачало дзейнічаць з 22:00 10 верасня і працягнецца да 23:59 9 снежня 2025 года.

Паведамляецца, што ўздоўж межаў з Беларуссю і Украінай ад заходу да ўзыходу сонца у вызначанай зоне дзейнічае поўная забарона на палёты за выключэннем ваенных самалётаў. Ад усходу да заходу сонца ў беспалётнай зоне дзейнічае шэраг выключэнняў. Пад іх трапляюць ваенныя і ўрадавыя самалёты, медыцынская авіяцыя і шэраг іншых службаў. Таксама выключэнне зробленае для пілатаваных паветраных судоў, якія адпраўляюцца ў палёт пасля падачы плана палёту і выконваюць шэраг пэўных патрабаванняў.

Палёты грамадзянскіх беспілотнікаў у гэтай зоне забароненыя кругласутачна.