Польшча не плануе следам за Літвой абвяшчаць надзвычайную сітуацыю
Польска-беларуская мяжа, ілюстрацыйнае фота / bialskieforum.pl
Польшча не будзе браць прыклад з Літвы, якая абвясціла надзвычайную сітуацыю на ўсёй тэрыторыі краіны ў сувязі з кантрабанднымі метэазондамі з тэрыторыі Беларусі. Пра гэта ў каментары Radio ZET паведаміў кіраўнік Міністэрства ўнутраных спраў і адміністрацыі краіны Марцін Кервіньскі.
Паводле яго, літоўскія ўлады планавалі ўвядзенне надзвычайнай сітуацыі цягам некалькіх тыдняў. Як кажа Кервіньскі, гэты рэжым будзе дзейнічаць з 9 снежня — верагодна, на працягу месяца. Рашэнне Літвы ён патлумачыў блізкасцю віленскага аэрапорта да мяжы. Праз гэта кантрабандныя паветраныя шары ствараюць вельмі сур'ёзныя праблемы — як лагістычныя, так і фінансавыя.
Але Польшча не будзе прымаць такія ж меры.
"Ніякіх зменаў у дзейных захадах не будзе, бо сітуацыя на польска-беларускай мяжы за апошнія тыдні палепшылася, а міграцыйны ціск знізіўся", — тлумачыць міністр унутраных спраў.
Пасля таго, як Польшча адкрыла два пераходы на мяжы з Беларуссю, колькасць мігрантаў, якія спрабуюць незаконна трапіць на тэрыторыю ЕС з Беларусі, знізілася да адзінкавых выпадкаў.
