Пасля згадкі пра пагрозу дэфолту РБ перайшла на новы механізм выплат

Беларусь перайшла на альтэрнатыўны механізм выплат па еўрабондах расійскім інвестарам. Пра гэта ўвечары 28 снежня паведаміў Мінфін РБ. Перад гэтым у адным з расійскіх тг-каналаў з'явілася інфармацыя пра тое, што "расійскія трымальнікі беларускіх аблігацый, якія Мінск ужо год як адмаўляецца пагашаць, плануюць ужо ў студзені давесці справу да суверэннага дэфолту Рэспублікі Беларусь". Рэакцыя была хуткай.

У Мінфіне Беларусі паведамілі, што 28 снежня "грашовыя сродкі ў беларускіх рублях" былі пералічаны ў "Нацыянальны разліковы дэпазітарый" (РФ) "з асобнага банкаўскага рахунка, адкрытага раней у ААТ "АСБ Беларусбанк" для выканання абавязацельстваў па еўрааблігацыях".

Як вядома, на фоне ўвядзення новых заходніх санкцый РБ стала ажыццяўляць выплаты па еўрабондах у беларускіх рублях (як вынік гэтага — міжнародныя крэдытныя рэйтынгавыя агенцтвы знізілі крэдытны рэйтынг краіны да пераддэфолтнага). Пацярпелі не толькі крэдыторы з "недружалюбных краін". У расійскіх інвестараў узніклі праблемы з атрыманнем гэтых выплат. Вясной аб'ём плацяжоў, якія завіслі, ацэньваўся ў 500 мільёнаў долараў. Восенню расіяне, якія ўклаліся ў беларускія каштоўныя паперы, звярнуліся да ўладаў сваёй краіны з просьбай абмежаваць крэдытаванне Беларусі. Тады Мінфін РБ анансаваў альтэрнатыўныя механізмы "выканання абавязацельстваў па еўрааблігацыях". Але, відаць, яны таксама не задавольваюць расійскіх інвестараў.