Паліттэхнолагу Віталю Шкляраву працягнулі тэрмін арышту на два месяцы

Паліттэхнолагу Віталю Шкляраву працягнулі тэрмін арышту на два месяцы. Пра гэта interfax.by паведаміў яго адвакат Антон Гашынскі. Паводле слоў Гашынскага, такое рашэнне абгрунтавалі тым, што Шкляраў можа збегчы з Беларусі.

Віталь Шкляраў нарадзіўся ў Гомелі, яму 44 гады. Ён паспеў папрацаваць у якасці паліттэхнолага на прэзідэнцкіх выбарах у ЗША і Расіі. Пра затрыманне Шклярава стала вядома 29 ліпеня. У жніўні яму выставілі абвінавачанне ў "арганізацыі і падрыхтоўцы дзеянняў, якія груба парушаюць грамадскі парадак". Ён прызнаны палітвязнем.

Шкляраў мае і амерыканскае грамадзянства. Яго лёсам заклапочаны ўлады ЗША, якія заклікалі яго неадкладна вызваліць.

Гашынскі кажа, што ў мінскім СІЗА Шкляраў мог перахварэць на каранавірус, нядаўна тэст паказаў наяўнасць у яго антыцелаў. Раней палітвязень скардзіўся на высокую тэмпературу і недамаганне.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.