Паліцыя Літвы праверыць заявы экс-кандыдата ў прэзідэнты ў Мінску

Паліцыя Літвы праверыць заявы экс-кандыдата ў прэзідэнты Эдуардаса Вайткуса, зробленыя ў Мінску. Пра гэта распарадзілася генеральны пракурор Літвы Ніда Грунскене.

Прэм'ер-міністр Літвы Гінтаўтас Палуцкас назваў заявы Вайткуса антыдзяржаўнай дзейнасцю. "Я думаю, што рашэнне Генпракуратуры — вельмі добрая ініцыятыва, для гэтага не патрэбныя палітычныя звароты. Тое, што робіць спадар Вайткус — гэта ці нейкая медыцынская з'ява, ці відавочныя дзеянні супраць інтарэсаў Літвы. Гэта антыдзяржаўная дзейнасць", — перадае DELFI словы кіраўніка літоўскага ўрада.

Як паведамлялася раней, 12 траўня Вайткус наведаў Мінск, дзе сустракаўся з кіраўніцтвам лукашэнкаўскай партыі "Белая Русь". На гэтай сустрэчы экс-кандыдат у прэзідэнты Літвы заявіў, што ў Літвы няма легітымнага прэзідэнта.

Лідар кансерватараў Лаўрынас Кашчунас звярнуўся ў Генпракуратуру і Дэпартамент дзяржбяспекі (ДДБ), каб там ацанілі візіт Вайткуса ў Беларусь. Ён папрасіў ацаніць, ці не з'яўляюцца дзеянні Вайткуса дапамогай іншай дзяржаве ў дзеяннях супраць Літвы.

На прэзідэнцкіх выбарах 2024 года Вайткус набраў 7,31% галасоў і заняў пятае месца.