Па факце аўтааварыі ля Бараўлянаў завялі крымінальную справу (фота)

Следчы камітэт распачаў крымінальную справу па факце трайной дарожнай аварыі, якая адбылося ўвечары 11 лютага каля вёскі Бараўляны пад Мінскам. У выніку здарэння адзін чалавек загінуў і восем трапілі ў лякарню.

Раней МНС паведамляла пра шэсць траўмаваных. Мікрааўтобус “Фольксваген” ішоў па маршруце Віцебск — Мінск.

Паводле інфармацыі Следчага камітэта, у аварыю трапілі маршрутная таксоўка, легкавы аўтамабіль “Форд” і грузавая фура МАН. Загінуў пасажыр маршруткі, пацярпелі кіроўцы ўсіх трох транспартных сродкаў, а таксама пяцёра пасажыраў маршрутнай таксоўкі.

Крымінальная справа заведзеная за парушэнне правілаў дарожнага руху, якое пацягнула за сабой па неасцярожнасці смерць чалавека. Дапытваюцца сведкі здарэння, прызначаны шэраг экспертызаў.