"Ніводны саюз не варты таго, каб страціць сябе" — Ціханоўская

Кіраўніца Аб'яднанага пераходнага кабінета Святлана Ціханоўская выступіла з заявай з нагоды "дня яднання народаў Беларусі і Расіі", які адзначаецца ў РБ 2 красавіка. "Адзін дыктатарскі рэжым трымаецца за іншы, як за адзіную апору сваёй улады, — піша яна. — І расплачваецца за гэты саюз незалежнасцю, свабодай і чалавечымі жыццямі".

Ціханоўская нагадвае, што адбываецца "поўнае падпарадкаванне нашай краіны інтарэсам Крамля". "Рэжым Лукашэнкі настроіў супраць сябе кожнага суседа, акрамя аднаго — і больш не мае выбару, акрамя як ісці за ім ва ўсім, — працягвае кіраўніца АПК. — Кожны крок, які рэжым робіць насустрач Пуціну, штурхае Беларусь да растварэння ў Расіі".

Святлана Ціханоўская падкрэслівае, што беларусы не выбіралі такога шляху. "Нам не патрэбныя саюзы, з-за якіх гінуць людзі і губляецца нашая нацыянальная самабытнасць, — піша яна. — Мы ўжо не раз паказвалі, што можам ствараць мастацкія шэдэўры, што становяцца вядомымі на ўвесь свет. Будаваць эканоміку, якая не залежыць ад крэдытаў. Самастойна гадаваць і выхоўваць новых навукоўцаў і вынаходнікаў, што працуюць на блага міру і будучыні, а не вайны і прапаганды".

Ціханоўская заклікае беларусаў перадаваць дзецям нашыя традыцыі і культуру, падтрымліваць беларускіх музыкаў, паэтаў, пісьменнікаў, мастакоў: "Ва ўсёй разнастайнасці беларускага — знайдзіце нешта блізкае душы. Паверце, ніводны саюз на свеце не варты таго, каб усё гэта страціць".