Найлепшым фільмам на прэміі "Оскар" прызнаная "Анора", у стужкі — пяць прызоў

На 97-й цырымонія ўручэння прэмій Амерыканскай кінаакадэміі найлепшым фільмам прызнаная стужка "Анора" Шона Бэйкера. Яна расказвае гісторыю жыцця рускамоўнай сэкс-работніцы на Брайтан-Біч.

Майкі Мэдысан, якая грала галоўную гераіню ў гэтым фільме, атрымала ўзнагароду за найлепшую жаночую ролю. Шон Бэйкер быў узнагароджаны "Оскарам" як найлепшы рэжысёр. Таксама фільм атрымаў узнагароды за найлепшы арыгінальны сцэнар і найлепшы мантаж. Агулам "Анора" заваявала пяць статуэтак — гэта найбольшая іх колькасць сёлета.

"Оскар" за найлепшую мужчынскую ролю атрымаў Эдрыен Броўдзі — ён граў Ласла Тота ў драме "Бруталіст".

Прыз за найлепшую мужчынскую ролю другога плана дастаўся Кірану Калкіну ("Сапраўдны боль"), а за найлепшую жаночую ролю другога плана — Зоі Салдана (мюзікл "Эмілія Перэс").

Найлепшай поўнаметражнай анімацыяй прызналі мультфільм "Паток" латвійскага рэжысёра Гінтса Зільбалодзіса. У карціне расказваецца пра ката, які ратуецца ад патопу. Гэта першая стужка з Латвіі, якая атрымала "Оскар".

Найлепшым дакументальным поўнаметражным фільмам прызналі стужку "Няма іншай зямлі", якая расказвае пра сяброўства паміж палестынскім актывістам і ізраільскім журналістам на Заходнім беразе ракі Іярдан.

Найлепшай песняй да фільма была прызнана кампазіцыя El Mal з фільма "Эмілія Перэс". Яе напісалі французскія музыканты Камій і Клеман Дзюколь, а таксама рэжысёр Жак Адыяр.

Фільм "Дзюна: Частка другая" атрымаў два "Оскары" — за найлепшы гук і найлепшыя візуальныя эфекты.

Найлепшым фільмам на замежнай мове прызналі бразільскую стужку "Я ўсё яшчэ тут".