На волю выйшаў экс-кіраўнік мастацкай суполкі "Пагоня" Генадзь Драздоў
Генадзь Драздоў / Радыё Свабода
Пасля двух з паловай гадоў у зняволенні з-за кратаў выйшаў палітзняволены мастак Генадзь Драздоў. У калоніі ён перанес два інсульты, піша праваабарончы цэнтр "Вясна".
Генадзь Драздоў нарадзіўся ў 1959 годзе ў Рагачоўскім раёне. Скончыў Мінскую мастацкую вучэльню імя А. Глебава, а потым Беларускую акадэмію мастацтваў. У мастацкіх выстаўках бярэ ўдзел з 1981 года. У 2011—2016 гадах ён узначальваў Раду творчай суполкі "Пагоня", якая існавала ў Саюзе мастакоў.
У жніўні 2022-га Драздова затрымалі: спярша прысудзілі 15 сутак, а потым пачалі крымінальную справу. У відэароліку пра затрыманне мастака паказалі партрэт Ніны Багінскай, які ён маляваў. Яго абвінавацілі ў "садзейнічанні экстрэмісцкай дзейнасці" (ч. 1 арт. 361-4 КК) і прысудзілі тры гады калоніі.
Пакаранне Драздоў адбываў у шклоўскай калоніі №17. Вядома, што ўзімку 2023 года мастака змяшчалі ў ШІЗА.
