На Вадохрышча ў Беларусі будзе да +7

У суботу, 18 студзеня, у Беларусі будзе воблачна з праясненнямі, паведамляе Белгідрамет.

Істотных ападкаў не чакаецца, толькі ўдзень месцамі па паўднёвым усходзе краіны пройдуць невялікія дажджы. Уначы і зранку ў асобных раёнах, як і ў пятніцу, прагназуецца слабы туман. Вецер будзе заходні, паўночна-заходні ўмераны, раніцай і ўдзень месцамі парывісты.

Тэрмометры ўначы пакажуць -1...+4, удзень чакаецца 2-7 градусаў цяпла.

19 студзеня праваслаўныя ў Беларусі будуць адзначаць Вадохрышча, але традыцыйных марозаў у гэты дзень не прагназуецца. Паводле сіноптыкаў, будзе пераважна без ападкаў. У асобных раёнах чакаецца слабы туман; уначы і зранку будзе слабы галалёд, на дарогах — галалёдзіца. Вецер прагназуецца заходні, паўночна-заходні парывісты, уначы на ўсходзе месцамі — моцны парывісты.

Тэрмометры пакажуць уначы -3...+3, удзень чакаецца 1-7 градусаў вышэй за нуль.