На святкаванні Дня горада ў Лідзе дзідай смяротна паранілі каня

Трагічная гісторыя адбылася ў Лідзе на святкаванні Дня горада 13 верасня. Падчас выступу смяротную рану атрымаў конь, у якога трапіла дзіда. Пра здарэнне піша выданне Onliner, куды звярнулася адна з відавочцаў.

Са словаў Вікторыі, трагедыя адбылася падчас выступу "рыцараў", якія на скаку спрабавалі ўсадзіць дзіду ў драўляны шчыт.

"Усе спробы ў асноўным былі няўдалымі: дзіда пастаянна адскоквала ад паверхні шчыта. Адзін раз яно паляцела ў незразумелым кірунку, у другі ці трэці трапіла ў нагу коні іншага вершніка, а пасля ледзь не прыляцела ў залу для гледачоў. Відаць было, што дзіды адскокваюць, але коннікі працягвалі іх кідаць. У нейкі момант пры чарговай такой спробе дзіда адскочыла і трапіла проста ў грудзі каня. І вось уявіце, карціна: конь стаіць з дзідай у грудной клетцы, людзі пачынаюць крычаць, вершнік пачынае адводзіць параненую жывёлу за будынак унутры панадворка, а шоу, нягледзячы на ўсё гэта, працягваецца", — згадвае яна.

Паводле яе, знайсці ветэрынара не ўдалося, таму супрацоўніца Лідскага замка выклікала звычайную хуткую. Аднак медыкі таксама былі збянтэжаныя.

Праз некалькі дзён беларуска даведалася, што конь памёр.

У конна-спартыўным клубе "Залатая шпора" журналістам пацвердзілі гібель жывёлы, але падрабязнасці расказваць не сталі: "Мы выступаем больш за 20 гадоў, ніколі такога не было, і прадказаць такое, на жаль, немагчыма. Усе магчымыя меры былі прынятыя максімальна хутка, ветэрынар прыехаў нават з Мінска".

Дырэктарка Лідскага гісторыка-мастацкага музея Наталля Хацяновіч выказала шкадаванне з нагоды інцыдэнту, але па адказы на ўсе пытанні адправіла журналістаў да ўладальніка жывёлы.