На Ніну Багінскую пачалі крымінальную справу за адзіночныя пікеты
Ніна Багінская, архіўнае фота / Euroradio
Крымінальную справу пачалі на 78-гадовую грамадскую актывістку Ніну Багінскую. Жанчыне інкрымінуюць арт. 342-2 Крымінальнага кодэкса (неаднаразовае парушэнне парадку арганізацыі або правядзення масавых мерапрыемстваў), паведамляюць праваабаронцы "Вясны".
Нагодай для крымінальнага пераследу сталі шпацыры са значкам бел-чырвона-белага колеру на адзенні і дэманстрацыя нацыянальнай сімволікі на мінскіх вуліцах у 2024 годзе.
Разгляд справы пачнецца неўзабаве ў судзе Першамайскага раёна Мінска. Паводле звестак праваабаронцаў, гэта сёмая справа паводле гэтага артыкула з моманту яго ўвядзення ў Крымінальны кодэкс, якая дайшла да суда.
Таксама паведамляецца, што падчас следства Багінскую некалькі разоў вазілі на псіхіятрычную экспертызу.
