Міліцыя выставіла вялізны цэннік "патрыятычнаму флэшмобу" ў Гомелі

У Гомелі пад пагрозай зрыву аказаўся аўтафлэшмоб, які запланавалі мясцовыя прыхільнікі Лукашэнкі.

На 24 красавіка яны запланавалі "патрыятычнае мерапрыемства". Аднак ужо 2 красавіка арганізатары сталі ад яго адмаўляцца з нагоды "адсутнасці фінансавання". Пра гэта выданне "Флагшток" даведалася ў адным з тэматычных чатаў.

Акцыю хацелі прымеркаваць да "80-годдзя Перамогі", якую шумна святкуе афіцыёз. Правесці яе планавалі на пляцоўцы перад Лядовым палацам. Аднак пры масавых мерапрыемствах неабходна зрабіць папярэднюю аплату міліцыі за паслугу па ахове грамадскага парадку падчас акцыі.

2 красавіка арганізатарка акцыі Кацярына напісала ў чаце, што за акцыю з больш чым сотняй удзельнікаў МУС патрабуе аж 150 базавых велічыняў: "Правядзенне аўтафлешмоба, запланаванага на 24.04.2025, адмяняецца ў сувязі з адсутнасцю фінансавання. І гэта не першакрасавіцкі жарт. 6300 руб — за "ахову правапарадку" на мерапрыемстве — не рэальна выцягнуць".

"Флагшток" піша, што па паведамленнях у чаце становіцца зразумела, што ініцыятары дамовіліся з уладамі правесці флэшмоб у іншым месцы горада неафіцыйна — без аплаты міліцыі.

Дарэчы, у 2022 годзе улады не ўзгаднілі такую акцуыю на Дзень Перамогі ў сувязі з расійскай вайной супраць Украіны. У жніўні 2022 года ініцыятары здолелі правесці акцыю да Дня горада. Але атрымалася яна не масавай: удалося сабраць аўтамабілістаў на пабудову адной толькі лічбы «8», хоць планавалася скласці "880".