Лукашэнка падпісаў закон аб узаемных гарантыях бяспекі з РФ

4 сакавіка Аляксандр Лукашэнка падпісаў закон "Аб ратыфікацыі дамовы паміж Рэспублікай Беларусь і Расійскай Федэрацыяй аб гарантыях бяспекі ў рамках саюзнай дзяржавы". Дамова была падпісаная ім і Уладзімірам Пуціным у Мінску ў снежні мінулага года. Цяпер жа адбылася яе ратыфікацыя (Пуцін падпісаў закон у канцы лютага).

Дамова аб гарантыях бяспекі прадугледжвае размяшчэнне расійскіх ваенных аб'ектаў на тэрыторыі Беларусі. У адпаведнасці з ёй, бакі абавязваюцца "падтрымліваць адзін аднаго ўсімі ўзгодненымі і дапушчальнымі міжнародным правам спосабамі і сродкамі, прадпрымаць адпаведныя дзеянні ў палітычнай, ваеннай і іншых сферах у выпадках замахаў на бяспеку любога з бакоў і саюзнай дзяржавы ў цэлым". Рашэнне аб прымяненні "для абароны Беларусі" размешчанай на яе тэрыторыі расійскай ядзернай зброі "прымаецца ў парадку, устаноўленым бакамі".

Таксама ў аўторак стала вядома, што Расія дазволіла рэжыму Лукашэнкі не плаціць па даўгах да 2031 года.