Ратыфікавалі дамову, якая дазваляе Расіі ствараць у Беларусі ваенныя аб'екты

26 лютага Палата прадстаўнікоў і Савет Рэспублікі Нацыянальнага сходу Беларусі ратыфікавалі дамову паміж РБ і РФ аб гарантыях бяспекі ў рамках саюзнай дзяржавы. Яна дазваляе Расіі ствараць у нашай краіне ваенныя аб'екты, размяшчаць на беларускай тэрыторыі расійскія войскі. Далей дакумент падпіша Аляксандр Лукашэнка. Раней дамову ўхвалілі ў Дзярждуме і Савеце Федэрацыі РФ.

Дамова аб гарантыях бяспекі была падпісаная ў Мінску 6 снежня 2024 года Лукашэнкам і Пуціным. У адпаведнасці з ёй, бакі абавязваюцца "падтрымліваць адзін аднаго ўсімі ўзгодненымі і дапушчальнымі міжнародным правам спосабамі і сродкамі, прадпрымаць адпаведныя дзеянні ў палітычнай, ваеннай і іншых сферах у выпадках замахаў на бяспеку любога з бакоў і саюзнай дзяржавы ў цэлым". Рашэнне аб прымяненні "для абароны Беларусі" размешчанай на яе тэрыторыі расійскай ядзернай зброі "прымаецца ў парадку, устаноўленым бакамі". Сцвярджаецца, што дамова "носіць абарончы характар і не накіравана супраць якіх‑небудзь краін і аб'яднанняў".